SUÖLÇMƏ MƏNTƏQƏLƏRİ

İstifadə olunma məqsədinə, istifadə edilmə müddətlərinə, konstruksiyalarına görə suölçmə məntəqələri müxtəlif qruplara və növlərə bölünür. İstifadə olunma məqsədinə görə suölçmə məntəqələri aşağıdakı növlərə ayrılır: 1) əsas məntəqələr – müntəzəm olaraq su səviyyəsi üzrə müşahidə aparmaq üçün qurulur. Müşahidə müddəti daimi xarakter daşıyır; 2) hidrokəsim məntəqələri – yalnız sərfin ölçülməsi üçün yaradılır. Bu, çox hallarda əsas məntəqədən aralı yerləşdirilir. 3) meyllik məntəqələri – çayın və digər axarların müəyyən hissəsində səviyyə düşməsini və ona müvafiq su səthinin meilliyini təyin etmək üçün nəzərdə tutulur; 4) hidroproqnoz məntəqələri – axarda suyun hidroloji rejimini öyrənmək üçün yaradılır; 5) xüsusi məntəqələr – yerli xarakter daşımaqla müəyyən məqsədlər üçün yaradılır. Burada yerli su mənbəyinə aid səciyyəvi kəmiyyətlər, proseslər tədqiq olunur. İstifadə olunma müddətinə görə suölçmə məntəqələri aşağıdakı növlərə bölünür: 1) daimi məntəqələr – uzun müddət üçün nəzərdə tutulur və burada stasionar olaraq səviyyə ölçülür; 2) müvəqqəti məntəqələr – tədqiqat-axtarış və tikinti vaxtları üçün yaradılır. İşlər tamamlandıqdan sonra onlar ləğv edilir; 3) səyyar məntəqələr – tədqiqat-axtarış dəstələrinin dayanacaq yerlərində tətbiq olunur. Konstruksiyalarına görə suölçmə məntəqələri aşağıdakı qruplara bölünür: 1) sadə məntəqələr – su səviyyəsi tamasa üzərində olan bölgülü şkalaya görə təyin edilir; 2) ötürücü məntəqələr – səviyyə su səthindən kənarda qeyd olunur. Bunun üçün ötürücü cihaz və avadanlıqdan istifadə olunur; 3) özüyazan məntəqələr – avtomatik olaraq müvafiq özüyazan cihazlar vasitəsilə səviyyə ölçülür; 4) məsafəli məntəqələr – səviyyənin dəyişməsi məlumatları fasiləsiz olaraq ölçmə yerindən istənilən qəbulediciyə ötürülür.